الثلاثاء ٣ شباط (فبراير) ٢٠٠٩ بقلم
فرعون
عشت لشعبك يا فرعون
إحنا وراك مليون مليون
اللي يخالفك يوم مجنون
ده أنت الهرم التالت
لحكامنا أصحاب النون
أولهم فارس مغوار
كان سيفه لعبة أطفال
والتاني أبو الأفكار
بغصن زيتون ناشف صبار
عشت لشعبك يا فرعون
وبالسلطة أفرح وأهتم
وبأيدك خدنا وودينا
لطريق كله ندامة وهم
أعوانك كتروا يا فرعون
خلوا حياتنا كلها غم
في كل مكان
بقى ليك هامان
وما اتعلمتش درس زمان
الظالم ها يجيله اليوم
وطريقه يتملى بغيوم
بحراسك والعصيان والشوم
وطوارئ خليتها قانون
ثبت عرشك
وإعلا وإعلا
وهاييجى اليوم
فيه تستعلا
وتقول، أنا ربكم الأعلى
ما أعوانك سموك الرمز
يوم ورا يوم بنتأخر
ومعاك أحلامنا بتتبخر
وإتعودنا على الأزمات
ولو قولنا عاوزين نختار
ويطلع لنا يوم له نهار
ها تقول هيهات هيهات
ومين سابه قبل الممات
ودي سيرة من قبلي وفات
عشت لشعبك يا فرعون
